由金融服務界團體聯合舉辦的2016年新春酒會，昨晚於港交所（388）展覽廳舉行，現場所見至少有近二百多人出席，衣香鬢影，場面墟冚。酒會人才濟濟不在話下，華華最估唔到嘅喺，國泰君安（1788）主席兼行政總裁閻峰竟然驚喜現身！事關舊年11月，國泰君安一度話聯絡唔到閻峰，當時市傳佢捲入咗中證監前副主席姚剛落馬一案，唔知喺咪用自己方式返去配合調查喇。直至聖誕節前夕，國泰君安才發公告，話已經搵返閻峰，仲強調佢只喺助查，佢本人和公司都唔喺被查的對象㖭。
閻峰復職之後，一直未有在公開場合露面，直到噚晚先以香港中資證券業協會永遠榮譽會長身份出席酒會。大家當然好想知佢失聯時去咗邊，個頭有冇乾淨咗咁。佢就答話自己復職之後一直留喺香港，再問多兩句助查的事，已唔願多講，急急腳在友人護送之下閃人。見到閻峰又活躍番喺業界社交場合，相信國泰君安嘅股東都放下心頭大石。
另外，唔少名人都有現身捧場，包括金發局主席史美倫、前立法會金融界議員詹培忠、旅發局主席林建岳，以及恒生（011）「一姐」副董事長兼行政總裁李慧敏。