大埔有個盆地，就是沙螺洞。從前是一塊爛地，現在是一個油菜花田。花田在山上，冇亭，冇池，冇鳥，但有樹，有花，仲要係有機，即係有屎。盆地個洞，有一大片油菜花，上年底仲係爛地一塊，並不惹人注意，一到2、3月間，真是花團錦簇，變成一個呃Like世界。
這幾天天氣唔算好，但花開得正好，看花的人也就最多。「花開呃Like機會來，山長水遠看花回」，fb裏，IG裏，WhatsApp上，微博上，經常看到有人post相：「#油菜花田」、「#真係好靚」或者說：「#行咗好耐先到攰死我。」
新聞都爭說沙螺洞油菜花，幾乎形成一種壓力，如果誰沒有到沙螺洞看花，就好像是蝕咗。
星期天，我們也去看花。進了長命斜，接踵摩肩，人就更多了，「班友好日唔行山，短裙熱褲衝上來」。
上山一條小路，係單線雙程行車路，兩旁、四周，都是車，塞死晒。司機坐在的士上，塞在路上，既不能上山，也看不見可U-turn的機會。
半粒幾鐘後，上到山，你不想亂跑，靜下來，看那一望無際的人，「港女港男齊自拍」，每個港女都彷彿要呼喝港男影到靚相為止。正在向雲端向四面八方post相，好像有一種Like但冇Share在網上不斷擴展。
看着看着，實在聞到有點臭，想找個地方坐下來休息逃離臭味，哪裏會唔臭？有機肥料都是屎。坐在一群自拍人旁邊，無意中聽一班師奶談論攝影美學：
一個喝道：「後面有人呀，影唔到住。」
另一個喝道：「點解你影到後面有人㗎！」
又一個呻：「都係影唔到，雖然後面冇人，但我塊面肥，也不好。」
一個青年人搶過去說：「『呢度有特殊科學價值，村民未經批准違規耕作』，也是破壞生態，好不好？」
一個人回答：「好的，好的，土地問題，說的是地產霸權。」
一個人不等他說完就接上去：「好是好，還不如村民條絕橋，『不要骨灰龕要村屋，化作景點種油菜花』，有陰謀論觀點，鄭子誠精神。」
有一個人一直不說話，人家問他，他說：「你班香港人，為咗影靚相呃Like扮model，索性踩入花田踩死晒啲花，係真係踩死咗好多呀！」
我也沒有說話。想起《花潮》一文中的泰山高處，有人在懸崖上刻了四個大字：「予欲無言」，其實也甚是多事。
回家的路上，還是聽到很多人紛紛議論。
有人說：「下次都係唔嚟，咁辛苦。」
有人說：「花開花落有時，升市跌市有時。」
好一個「升市跌市有時」。我一面走看，一面聽人家說着，自己也默念着這樣兩句話：
港人羊群心理嚴重，難怪老散成日中伏。
按：文章二次創作會考範文《花潮》，作者李廣田。
千頌C
http://fb.com/winbigwok
本欄逢周三刊出