新民黨噚日趁元宵節同傳媒茶敍，黨主席葉劉淑儀席間分享「老土情人節故事」，其實係細述剩女心聲。葉劉自嘲：「我最冇桃花運，冇拍過拖，冇乜人約，讀書時同人睇過戲嘅，一兩次就冇下文。」點解少女時代都男人勿近呀？佢笑言，讀書時好勤力，所以冇乜參與社交聯誼活動；畢業後做咗政務官，朝八晚八忙不停，當時都冇諗要嫁人嘅事，直至28、29歲，媽媽開始戥佢心急，就同佢物色意中人，約親友嘅囝囝出嚟相睇。
葉劉話呀，30歲先識到大佢15年嘅丈夫，當年三字頭已經「好剩」嘞。當日相睇飲茶之後，一直等對方再約，真係好鬼驚收唔到對方電話，直至一星期後終於等到，葉生約佢去流浮山食海鮮，原來家住飛鵝山嘅葉生專登揀到冇雷公咁遠，係想趁車程多啲了解，結果一拍即合，識咗半年就嗱嗱臨拉埋天窗，告別佢嘅剩女生涯！
話選特首「唔講得」
長者卡都攞埋嘅葉劉，𠵱家梗係心繫從政而唔思春，嚟緊立法會選舉佢話有意再戰港島；雖則立法會主席曾鈺成話退下火線，葉太自言冇興趣爭主席嚟做，因為好似班主任咁管住議員實在太悶。咁選特首又有冇興趣呢？佢話「唔講得」，自言政務官出身，素來做實事同希望推動政策喎！除咗葉劉嘅愛情故事，新民黨仲有喜事分享，副主席田北辰又添孫女，請大家食薑醋㖭。
李八方
mailto:[email protected]