林峯昨日到商台為4月舉行的「Heart Attack」演唱會宣傳，忙於為個唱操肌的他，明顯清減不少：「我皮厚呀，啲腹肌好難現，𠵱家仲努力緊。希望操得幾多得幾多。」林峯表示現時幾乎戒掉所有穀糧食物：「我肚餓就食生菜，新年唔食得蘿蔔糕嗰啲，同屋企人講淨係可以食鮑魚囉，哈哈。」他謂戒口初期因為血糖低做運動見暈，但現時已適應。
問到與女友吳千語外出食飯要忍口？林峯說：「佢食晒咪好囉，不過𠵱家好少出街食，多數喺屋企煮。」記者笑指他要追上千語體重，他即笑謂：「點都唔會瘦過佢。」林峯又表示高興仍有長時間準備演唱會，希望完成個唱後仍可以保持狀態。
採訪、攝影：盧妹