有老前輩話，濠賭業不景氣唔緊要，最大賭場咪就係港交所（388）。宏利資產管理亞洲區資本市場高級策略師羅卓夫（Geoff Lewis）都係咁話！
最新一份「宏利投資者意向指數」報告（香港有500名受訪者）顯示，香港市場有22%投資者有負債（不包按揭），平均負債水平達月入4.8倍。而舊年佢哋欠債，最大原因就係投資虧損，其次係日常開支與消費開支（買衫、旅行等）。
羅卓夫又話，雖然呢個調查冇問投資虧損，包唔包括借孖展炒股，但有小部份港人的確視投資如「去澳門（賭錢）」，香港真係有必要加強投資者教育咁話。宏利資產管理高級執行總監李錦榮補充話，財經「識字率」好緊要，𠵱家好多後生仔學歷高，但不善理財，十分可惜。