梁振英聲稱旺角事件無須成立委員會調查，示威青年不代表全港青年人，當然係代表咗政府及建制派立場。回想到去年佢突然炒曾德成魷魚，不惜得罪香港土共及民建聯，罪狀（據消息人士吹風）之一就係曾德成唔識搞青年工作（即是話統戰青年失敗）。後來搵咗劉江華代替曾德成，唔通劉江華又識做青年工作？怕好難咯，佢最識就係搵區議會工作嘅啫。收政府撥款，長期在前線搞青年工作嘅，就係青年協會總幹事王䓪鳴。王女士自1980年（28歲）做到而家（64歲），名成利就，歷年位居要職，但如果有人問，過去36年來，王女士對香港青年有過甚麼重大貢獻，都怕幾難搵到肯定答案。呢位青年工作權威唔通要做到70歲？青年事務委員會主席劉鳴煒只係30歲出頭啫，同有資格做佢阿媽嘅王䓪鳴合作推動青年事務，有冇代溝呀？
青年人想法主張與上一代不同，代溝時常有。一位應該係年青嘅讀者W來電郵講：
「左先生前輩：
今日之經濟皆基於百年來規條進行，要升要快要錢包漲（脹），獨肥於幾人，但面對北極圈溶化，北極熊無立椎之地，人類未來亦然，人類捨食物以吃金銀財帛乎？後輩不明，煩請解說。」
呢位讀者係睇完本欄於2月6日講「日本迷思」之後來郵嘅。該文講及今日日本青年搵全職工作難，即使企業職位，薪水十年來幾乎停留不動，莫講話積蓄買樓，想話出國到香港旅行亦有困難，不比本港同齡年青人可以一批又一批咁去日本食壽司。呢位讀者W大概質疑過往之經濟發展模式破壞環保，造成貧富不均，氣候不平衡，禍延北極以至全球，人類將有自找滅亡之風險，要左丁山解釋。
一句話：不會！左丁山讀書年代，已有Club of Rome於1972年發表The Limits to Growth一份報告，引起全球注意，當時左丁山在讀經濟學碩士，教授要我地閱讀此報告，略知皮毛，報告立論係世界人口、工業化、污染、糧食生產及資源消耗，係以幾何級數增長，而科技及生產力係線性增長（linear），世界經濟會在21世紀中或21世紀後期崩潰。44年之後，當今經濟學界仍然為此份報告不斷辯論，主流經濟學界認為科技進步可以解決所謂「崩潰」問題。對中國印度加埋有27億人嚟講，現時嘅收入及福利比1972年好好多，對日本一億人口嚟講，2016比1972可能只係略有進步；以後一百年，環球經濟會否沿着過去100年規條進行？左丁山係樂觀派，相信可以，但會傾向比較注重環保，比以前更重視增長與生態、空氣之平衡，有需求就會引來供應，科技不斷會創新，解決食物問題。