長毛同人力快必譚得志舊年喺全港校際辯論比賽向林鄭示威，雙雙被票控，案件噚日預審，10月5日開審。裁判官問長毛嗰日得唔得閒，長毛話唔肯定到時仲係唔係立法會議員；裁判官又問佢介唔介意搵個審過佢嘅官？長毛最初話唔介意，但跟住話「最介意俾杜浩成審」，裁判官則話杜官已調到其他法庭。八方同長毛確認，佢冇試過俾杜官定罪，但就曾批評杜官。翻查資料，古思堯同另一社民連成員喺中聯辦燒區旗，俾杜官裁定侮辱區旗罪成，杜官將成員扣押候判，長毛曾批杜官政治立場偏頗。