趣趣地:狂遭投訴球證拉隊罷吹

趣趣地:
狂遭投訴球證拉隊罷吹

前晚利華古遜主場負多蒙特0:1場德甲有離奇事件,球證施華亞(右)趕唔到利華教練舒密特出場後,暫停比賽拉隊返更衣室。
事緣多蒙中場施雲賓達喺64分鐘被侵犯之後,佢隊友馬菲亞斯真達快開罰球之餘兼將個罰球位推前咗幾米,最後仲由奧巴美揚射入。舒密特之後非常激動,係咁投訴,於是施華亞先後透過第四球證同利華隊長傑斯寧叫舒密特離場,但舒密特死都唔肯走,結果施華亞決定暫停比賽九分鐘。前國際球證陳譚新指出:「球證只係負責球場以內發生嘅事,利華教練被逐不肯離場,應交由第四球證同足總職員處理,因球例講明被逐職球員必須離開場區,比賽先可重新展開;𠵱家球證選擇返回更衣室等消息,就會睇唔到場內情況,呢個球證處理手法唔高明。」施華亞話多蒙喺入波前自己個判決好正確,但就承認睇唔到多蒙中堅柏柏斯達夫普路斯禁區內犯手球而吹罰12碼。