毛記電視真係當自己無記咁做噃，除咗分獎典禮，仲搞咗個毛記電視新界東補選論壇，現年34歲嘅公民黨候選人楊岳橋為配合大大台，即時着番件校服出席論壇，拉攏年輕選民支持，相中可見身穿校服嘅「岳少」，插袋影相時入型入格，好似星爺《逃學威龍》咁款，有啲早前拍「This AY」短片時嘅不羈，一掃過去幾日一臉憂戚嘅樣子。
岳少張相喺facebook一出，輕輕鬆鬆呃到過千個like，佢喺fb話，候選人梁天琦同方國珊都會出席論壇，但論壇仲未出街，未知各人會點語出驚人。至於其他候選人，包括周浩鼎、黃成智、梁思豪、劉志成，唔通忙於google搵醫院、打怪獸，未克出席？