今季完結後將會退役嘅湖人球星拜恩（Kobe Bryant），喺周日常規賽最後一次作客公牛；公牛特登錄咗段短片向佢致敬，曾經同佢喺湖人合作贏過總冠軍嘅加素（Pau Gasol），亦特別喺介紹片中歡迎拜恩，場面相當感人。
笑言投巴塞續前緣
上周五作客馬刺激戰到手指甩骱嘅拜恩，今場堅持正選上陣仲拎到22分，可惜湖人最後都輸115:126。最後一次同拜恩交手嘅加素賽後話：「喺NBA中，冇幾多個球員可以好似Kobe咁打足廿季，而且仲係咁具侵略性。」佢又話呢場可以擊敗拜恩，係一件值得開心嘅事。拜恩亦都好唔捨得呢位兄弟，仲話曾經以為可以同加素喺同一隊退役：「最後一次同佢交手嘅感覺真係好奇怪。不過，話唔定我哋離開咗NBA之後，會一齊加盟巴塞籃球隊，咁就可以再做隊友。」
係人都知拜恩嘅偶像係「籃球之神」米高佐敦（Michael Jordan），佢就爆料話自己差啲喺2004年加盟公牛：「當時傳出湖人會交易奧尼爾（Shaquille O'Neal）嘅消息，我就覺得可以留隊。我亦慶幸留咗喺湖人，因為我擔心自己嘅成就唔可以超越MJ。」
