立法會噚日新春酒會邀請特首梁振英、行會成員同高官出席。CY上場後，行政立法關係有幾差？唔使八方多講嘞，過往都係舉行新春午宴，玩吓遊戲，打成一片，但今年議員官員寒暄幾句就閃人。
長毛就預備咗兩份大禮畀CY，就係「一帶一路吹水督導大獎」，批評佢千億買磚頭，斗零救白頭，只做基建唔做全民退保；另一份係1966年九龍騷動調查委員會報告書，叫CY學吓前朝！長毛仲上台力數CY，對方一貫皮笑肉不笑，冇接「禮物」，最後保安請長毛離開。曾鈺成之後上台發言話元宵係「月圓之夜」，台下有人細聲笑，唔知係咪同八方一樣諗起月圓有人狼？佢話官員議員都係對多5個月，希望用最大善意、最多包容處理積壓嘅事務。曾鈺成笑言酒會後同太太撐枱腳，不過唔買花咁老土喎！