內地真人騷《爸爸去哪兒》、《爸爸回來了》同《音樂大師課》等等，收視統統都唔錯。梗係啦！睇小朋友真人騷總是充滿樂趣，之不過同時都危機四伏。唔知係咪因為吳鎮宇同囝囝Feynman去澳洲拍《爸爸去哪兒》時，Feynman受咗傷，
搞到好多手尾出嚟。前日有網民喺微博爆料，話內地廣電總局將會嚴控未成年人參與真人騷，包括控制未成年人參加嘅真人騷節目數量，同時加強審查把關。至於星二代參加真人騷，原則上係唔俾播。如果消息係真嘅話，可能以後內地觀眾開電視，只可以睇到《老公去哪兒》、《老爺去哪兒》或者《全家大人去哪兒》。