眨吓眼，國泰航空（293）前行政總裁湯彥麟（Tony Tyler），已經做咗國際航空運輸協會（IATA）理事長差不多5年。佢噚日回港宣佈，今年中任期屆滿後離任，並打算休息一下。被問到會唔會再戰航空業，佢就耍手擰頭話唔再做任何公司嘅行政職位。
今年60歲嘅湯彥麟，2011年離開服務超過32年嘅國泰，過檔IATA為全球大部份航空公司發聲。不過，IATA份工都唔易打，除咗發生震驚全球嘅馬航MH370事件外，亦有德國之翼機師「自殺性」空難，搞到湯彥麟要經常代表IATA出嚟拆彈。
湯彥麟話，年中退任後，有一半時間定居香港，佢唔介意做與航空相關嘅顧問角色，但肯定唔再做任何行政職位，亦無意返國泰或太古A（019）工作。至於香港航空呢？湯彥麟話唔可以答任何假設性問題喎。