擁有高䠷身形嘅公民黨副主席陳淑莊Tanya，曾經係肥妹仔？Tanya笑笑口話，那些年確實真係有「肉地」㗎，都係暴飲暴食兼對可樂上癮惹的禍！
Tanya憶述小學六年級前，仲可以為大家帶來「美腿」，睇番由佢4、5年級嘅兒時照；果然，腳仍是有的，仲好識得擺pose，難怪未從政前已可登上舞台。但佢話喎，自從小六開始，突然愛上可樂，「試過一日最高紀錄係飲4罐」，結果一飲成癮，身形開始暴脹，自稱喺嘉諾撒聖心書院嘅中學時代，冇．瘦．過……
見工問老細「係咪包三餐」
嗱，等八方睇真啲……肉地係有啲，又唔係好肥，但Tanya話唔好少睇佢嘅暴脹力，皆因高𥧌期去過130幾磅，衫褲唔啱着已不在話下，最頂唔順係自己入𨋢時，架𨋢會搖，極之尷尬，所以佢就趁年輕、身體新陳代謝仲夠快之時，積極減肥，fit到𠵱家。
到底佢有幾鍾意食嘢？Tanya舉咗個例，佢話大學時代出去做暑期工，喺灣仔一間五星級酒店返工，老細喺面試最後一個環節，問佢有乜問題啦，佢竟然唔係問有冇晉升機會，而係問老闆：「你哋係咪包三餐？」