禮拜三谷草百萬挑戰盃終極戰用C跑道作賽，睇番最近1月20日同一移欄賽事，真係走得快、好世界，當晚八場賽事，竟有七匹頭馬守前三位入直路建功，其中「包裝騎士」及「及時取勝」更加一放到底掄元，後上馬好難追，所以都係要秤先具前速擺前走之馬匹。今戰列陣馬中，四場「喜喜寶」上仗正是於1月20日跑谷C欄擺前贏馬，今次又等番同一移欄上陣，繼續由莫雷拉壓陣可再下一城。另外，六場「控制者」以往兩次跑谷C欄都未輸過，子彈快馬場地性能唔使懷疑，結合跑道形勢可一放絕塵。