趣趣地：
曼城玩嘢派𡃁仔俾「車」撞

曼城（圖）都算玩嘢，為咗留力踢周三訪基輔戴拿模場歐聯16強首回合，喺前晚作客車路士場英足盃第五圈派六個𡃁仔打正選。面對強陣嘅車仔，佢哋梗係唔夠抽啦，最終俾車仔嘅迪亞高哥斯達、韋利安、加利卡希爾、夏薩特同埋貝特蘭查奧爾各入一球而慘輸1:5。車仔八強會鬥愛華頓，講真唔易打，但阿仙奴就抽到好籤，如重賽贏到侯城將會喺主場同屈福特爭入四強。另外，車仔就有球迷向曼城球員掟銀仔展開調查，表明滋事者終身唔畀入史丹福橋球場睇波。