一講新地（016）大股東郭氏家族，大家通常只係記起郭氏三兄弟，即係郭炳湘、郭炳江與郭炳聯，查實佢哋有個細妹郭婉儀。噚日新地公佈今年有7名員工子女獲得「新地集團員工子女本科獎學金」，郭炳聯與細妹郭婉儀就一齊出席頒獎儀式，佢兩兄妹望落都幾似樣喎。
郭婉儀係新地郭氏基金會執行董事，亦擔任新地員工子女獎學金嘅評選委員，所以呢日就同阿哥一齊頒獎，平時真係好少機會見到佢真人。據講，佢丈夫陳達年係牙醫，育有兩子。
講番新地呢個獎學金，早於2010年設立，每年有7至10名員工子女獲得，金額就視乎員工子女入讀邊間大學，總之讓對方完成大專/大學課程，佢哋亦可以申請參加新地嘅暑假實習計劃。新地呢招既可以𠱁員工，又可以招攬新血，都算係一舉兩得。