日本實施負利率後，小存戶睇見自己啲血汗錢放喺銀行冇息食，紛紛各出奇謀，有人寧願買夾萬返屋企儲錢，刺激夾萬銷售上升，亦有日本大媽選擇以月供形式買百貨禮券，務求獲贈獎賞。
市傳𠵱家越來越多日本大媽去登記百貨公司嘅「友之會」，以月供形式買禮券。每月準時交供款，又完成一年期嘅供款期，個別百貨公司仲會送出額外一個月獎金。日本高島屋、大丸松阪屋同小田急百貨都有類似「友之會」計劃，每月供款由5,000至5萬日圓不等。
唔想搞咁多，又覺得放錢喺銀行嘥氣，有日本人就買夾萬返屋企放錢，聽講仲因此推高夾萬銷情㖭呀。上網搵，日本夾萬款多、尺碼又齊。想又平又的骰，好似化妝袋咁大，4,000日圓有找，大約300港元。如果想好似個曲奇餅盒兼備防水功能，盛惠3萬日圓，約2,000港元。