創科局局長楊偉雄早前同年輕企業家傾偈，話自己見過Steve Jobs，仲要係「我見過！我真係見過！」俾網民抽到水塘都乾，局長噚日又同特首梁振英孖公仔到橫頭磡樂善堂余近卿中學，同學生分享對創新科技睇法。之不過呢，活動事前冇通知傳媒，記者嚟到亦唔准入場，有學生仲耍手擰頭，話學校講明唔好同記者講CY同楊局長講過乜，乜事咁神秘先？
轉個頭，CY已經喺facebook上載活動照片，話參觀咗同學仔嘅創新科技，好似自己設計嘅機械人同3D打印，仲喺台上同幾百個師生一齊跟住機械人做體操，張相見到CY半踎低、架起手肘跳舞，個樣好享受咁喎。校方就話今次活動有埋樂善堂其他學校學生參與，原本只邀請楊偉雄分享對創科嘅睇法，但之後收到回覆話特首都會嚟喎。