正所謂愛嘅反面就係恨，阿仙奴領隊雲格2014年收購蘇亞雷斯不成，阿蘇轉投巴塞隆拿就大放異彩，上周六西甲又先開紀錄，幫球隊2:1險勝拉斯彭馬斯；周二阿仙奴歐聯16強就主場對巴塞隆拿，雲格賽前講到明要踢得更加狠，十足《少林足球》謝賢飾演嘅強雄上身一樣。
阿蘇連續七場入波
巴塞隆拿上周六作客2:1險勝拉軍，聯賽取得八連勝，入球功臣亦都熟口熟面，阿蘇同尼馬各建一功；阿蘇呢期就真係腳風順到不得了，連續七場有上陣比賽都建功，仲累積入12球㖭，聯賽入球已經增至25個，喺西甲已經比貝迪斯、馬拉加、愛斯賓奴等五支球隊嘅單一球隊總入球都要高（未計周日戰果），連埋各盃賽亦都有41球進賬。阿蘇賽後就好謙虛咁講：「個人數據對自己唔重要，最緊要係幫到球隊贏波。」
收購阿蘇不遂添恨意
繼2011年16強後，阿仙奴又將於歐聯同巴塞隆拿交手，雖然未夠十年，兩軍人事都幾番新，好似阿仙奴隊長尹佩斯、法比加斯等都已經離開，巴塞嘅三叉戟組合雖然仲有美斯，不過由韋拿、柏度洛迪古斯，已經變成尼馬同阿蘇。講開29歲烏拉圭前鋒蘇亞雷斯，相信就最令雲格氣頂，事關13年阿蘇已經有意離開利物浦，當時阿仙奴就提出4千萬鎊（約4.5億港元）收購，不過紅軍隊長謝拉特就叫阿蘇留多一季，阿蘇真係聽謝拉特話；雖然最終都未能拎到英超冠軍，但14年以更高價轉投巴塞，上季更幫球隊拎西甲、歐聯及西盃三大錦標，證明唔去阿仙奴都係啱。
講真當年阿仙奴同巴塞隆拿已經係四六波，今時今日兩軍差距就更加可能拉到三七波，兵工廠上周六英足盃16強主場對侯城，攻足大半場都入唔到波，悶和0:0要踢重賽，對未來歐聯同英超部署更加百上加斤。而對於被問到點對付巴塞強攻，雲格已經講明鬥控球就一定輸，所以防守上要更加辣，唔知雲格會唔會好似《少林足球》嘅強雄咁，叫班球員追住阿蘇嚟侵犯，以報險簽之仇呢？