俗稱網絡23條嘅《版權條例》審議至今仍然膠着，早前法案委員會主席陳鑑林搞咗場四方會議，各方代表都係各自表述，冇達到任何共識。鍵盤戰線發言人、滑鼠娘娘鄺頌晴（圖）噚日同八方講，佢哋正草擬緊一個新方案，希望一個月內提出，主要針對之前四方會議中，泛民、建制議員都願意考慮嘅有限嘅公平使用原則 （limited fair use），會搵美國版權專家余家明教授畀意見。佢話既然版權大聯盟立場咁強硬，佢哋提出新方案時都會約見政府，認為再開四方會議討論作用不大。
鍵盤戰線更會推出手機程式，等市民可以將示威及警方濫權等片段上載，畀抗爭者有需要時可用作呈堂證據等。