這天賽事有一項特色，就係同場重磅大冧巴同輕磅細冧巴馬，一頭一尾串Q，如第二場12號「領先直前」搭2號「知道勝」，以及第三場14號「育成群駒」搭1號「再石磨藍」都係呢種情況。
到了第八場三班草地1200米有樣學樣，全場最重磅兼最熱的1號兼1檔馬「活力小駒」，夥拍夾慣夾熟的潘頓，後上臨門力鞭，及時超越13檔起步、放到甩晒轆的14號大冷馬「花紅」。結果「活力小駒」險勝短馬頭位，2.6倍連捷於同程同班，組合獨贏A1派14.5元，潘頓刑滿復出即有馬贏，兼壓過同鄉柏寶殺上騎師榜第二位。
「花紅」排位後因楊明綸口傷未癒而換蔡明紹，今場紹仔發揮極佳，策14檔之「花紅」極其快閘如偷步般，很快切入帶放，控制步速得宜，奈何「活力小駒」太超，「花紅」62倍win爆唔出連捷失敗，紹仔亦無緣打開傷癒復出勝門，不過上述一對新勝馬一追一放，卻就此包辦95倍大冷Q。
今場蘇兆輝騎次熱「真心意」後上第三，巫斯義策文廐半冷初出馬「凝聚力」得第四，四重彩派四萬蚊左右。