中環在線：
攜家人睇戲　葉茂林靚老婆曝光 - 李華華

耀才證券（1428）噚日喺銅鑼灣一間戲院包場請客睇戲，64歲嘅老闆葉茂林一早到場招呼熟客，佢位又靚又後生嘅老婆亦首度現身，仲帶埋兩位分別10歲同7歲嘅公子一齊入場睇戲。而葉茂林都幾主動介紹兩位公子，叫傳媒「過嚟同我兩個小朋友影相喇」。
講到家人，葉老闆有位千金葉穎恩早於2012年加入耀才幫手，不過近年好少露面，噚日都冇到。葉老闆解釋話，佢個女正在籌備開一間café，想自己創一番事業，唔想俾人話靠父蔭咁話。

葉穎恩將來會將時間分開一半一半，分別打理自己生意同耀才業務。葉老闆亦睇得好開，指「人各有志就由佢喇，我自己仲捱得，𠱁吓啲仔，睇吓邊個肯做（接班）」。咁又係呀，葉老闆有7名子女，始終總會有人會接班嘅。