噚日朝早喺觀塘海濱花園，離奇地有好多條「香蕉」周圍走，連財爺鬍鬚曾都着埋黃色，同啲蕉都好鬼襯。原來呢個係名為「蕉夫東九」嘅競技慈善比賽，由起動九龍東舉辦，主要為香港神託會「青年新領域」青少年精神健康服務及「童夢‧童行」發展基金籌募營運及發展經費。
點解活動會叫「蕉夫」？因為香蕉呢樣生果經常比喻作正能量，而組隊落場嘅參加者，要同唔同隊伍喺競技賽爭奪最多香蕉，希望別開生面嘅比賽可以為大家帶來歡樂之餘，又幫到有需要嘅人。主辦單位邀請財爺做嘉賓，相信都係睇中鬍鬚曾成日搞gag，唔少「香蕉」仲同鬍鬚曾selfie（圖），八方就希望周三發表嘅預算案唔會令市民叫佢「吔蕉」！