成班中環校友吃猴年開年飯。話題好快又聚焦於「旺角暴亂」事件，當然係聲音一面倒，全部不以為然，呢班所謂senior alumni包括左丁山在內，都有過做大學「學長」mentor嘅經驗，可惜經驗不甚愉快，原因係在校嘅師弟妹好似同中環學長鬥忙，又不主動，約見面食餐飯傾吓偈嘅，通常係學長做主動。航運C就講：「諗住周末得閒，打電話搵女mentee見吓面，分享吓人生經驗，了解對佢嘅觀點，點知mentee話周末好唔得閒噃，唯有作罷。」呢個就係問題所在。學生mentee星期一至五要上堂，要去實驗室，周末就要去街拍拖睇戲或者打機，或者離開宿舍返屋企見爸媽，點得閒與mentor會面呀。如是者大學一年頂多見一次至兩次，mentor / mentee之間根本無溝通可言，無法建立以舊帶新嘅關係，學長制名存實亡，冇乜意思。大家既然對自己嘅mentee都唔了解，遑論其他學生吖，故此對大學生參與旺角街頭活動，自然又係一片指責之聲，絕不支持。
地產L話聽港台第三台英文台之早上節目，聽到訪問兩位港英時代嘅高級警官Stephen Vickers及另外一位唔知道名字嘅，呢兩位曾偉雄前輩都異口同聲咁指出當晚十一點零鐘出事，搞到凌晨三四點，警方仍然無法控制場面，防暴隊被群眾衝散捱打，簡直係咄咄怪事，旺角區指揮官與警察總部當時都唔知發生咗乜嘢事，財務A剛與兩位退休警司打完波，佢引述兩位警司嘅意見，係懷疑現任一哥與前線指揮官根本溝通不靈，此事對盧偉聰及九龍、旺角嘅警隊高層嚟講，係一個嚴重打擊，警隊內部應該檢討，即使梁振英唔設立調查委員會，警隊亦應該由內部徹查整件事之來龍去脈及指揮錯失。賓架P就話左丁山寫掟磚頭，令佢諗起舊事，十幾年前政府部門討論在大街大巷鋪磚頭代替水泥混凝土一事，賓架P當時略有知聞，好多個部門為咗環保與經濟理由贊成，獨是警務處以街頭安全理由反對，但當時太平盛世，警務處過份保守，過慮啫！故此政府拍板鋪磚頭，想不到今天警務處嘅憂慮竟成為事實，街道磚頭可輕易成為示威者武器！從今以後，街道鋪磚頭政策會唔會靜靜雞凍結呢？大有可能！