每年兩會，香港嘅政協委員同人大代表都齊集北京，開會當然重要、但收風一樣好緊要，皆因此行係了解阿爺睇法嘅大好機會，以免收錯風跟錯隊就大件事咯！
八方聽聞，國家主席習近平今年如常喺兩會期間接見港澳政協委員，暫定係3月6日、即係人大開幕後翌日。有政協委員就話今年習大大見佢哋嘅日子，好似遲咗，以前好似3月4日、即係政協開幕翌日就見，但遲咗又唔代表冇心見嘅！
由於一班身兼立法會議員嘅香港政協委員同人大代表，要喺3月4日開完財委會後先喺傍晚動身北上，如果3月4日見人就唔齊腳，似乎唔係太好，相信因此令見面時間押後，以便所有委員人人有份、永不落空。至於習大大有乜「聖旨」要頒？八方當然唔知啦，會唔會觸及本土問題，要由佢親自解謎！