上周六喺巴西里約熱內盧舉行嘅跳水世界盃，中國「夢之隊」嘅吳敏霞同施廷懋以339.6分，成功衞冕女子雙人三米板，呢面金牌亦都令中國喺呢個項目拎到七連冠。
拍施廷懋贏雙人三米板
30歲嘅吳敏霞夥拍24歲的施廷懋出戰女子雙人三米板，佢哋憑住穩定嘅演出，以27.33分力壓加拿大組合贏得冠軍。分別試過同郭晶晶、何姿同施廷懋成為拍檔嘅吳敏霞，今次贏得自己喺跳水世界盃第九次冠軍，包括六次女子雙人三米板同三次個人三米板；再勁啲嘅紀錄就係，佢憑呢面金牌超越奪冠八次嘅同胞郭晶晶、陳若琳，成為跳水世界盃奪冠次數最多嘅女選手。
周一會上演男子三米板決賽，中國兩名選手曹緣同何超都好有實力，睇嚟好有機會為「夢之隊」再擸多面獎牌。（無綫網絡電視13台今日7:15am直播）