這天第三場四班1400米，由葉廐贏馬攞彩，昨日專誠去澳門馬場幫老友兼練馬師馮耀正打氣嘅葉楚航，今場將輕磅馬「育成群駒」交畀外號小鮮肉的史卓豐發揮，人馬首度合作即擦出火花，此駒拉士後上如箭，力壓2.6倍大熱門蘇兆輝座騎「再石磨藍」，粉碎蘇兆輝贏馬告別香江的大計，史卓豐自己則連續第二次日賽有馬贏，上周日他於泥地贏高廐冷門「你好馬」。
「育成群駒」今場臨尾票如雨下，着綠燈跌到7.6倍開跑，結果打破馬兒本身兩年頭馬荒，組合獨贏A3派37元。二至四名分別係「再石磨藍」、「變出美麗」及「凱旋星光」，四重彩一萬三千蚊鬆啲。
今場末段連番出現馬匹斜跑互相擠壓鏡頭，先係「變出美麗」於韋達胯下唔止一次向外斜出，臨尾再有「育成群駒」壓向外側的「再石磨藍」。蘇兆輝以受干擾及只輸短馬頭位為理由，賽後抗議「育成群駒」頭馬資格，不過被判無效賽果不變。
葉楚航說：「對於抗議事件我不太擔心，我有信心『育成群駒』不會被告甩。『育成群駒』贏在對手不太強，排檔又好，史卓豐努力減磅至115磅策此馬，他的韁繩比較柔，很合此馬。我馬房有兩匹馬好合史卓豐的韁繩，除了『育成群駒』外便是『保羅威威』。」