經民聯立法會議員梁美芬都識rap歌？係咪好想聽吓呢？可惜暫時冇機會咯！人稱鼠王芬嘅梁美芬噚日同傳媒新年茶敍，分享一段年初一前已經拍好、但到年十四都仲未出街嘅「絕密」賀年片，佢喺片中同一個名為「真‧梁靚芬社區合唱團」7位朋友進行三次創作，模仿毛記電視版本嘅《鼠能夠》，將基督教聖詩《主能夠》改成《真能夠》。梁美芬喺片中仲戴帽同rap歌，金句係「只要有堅持，我哋都能夠」。
梁美芬話首歌佢自己用咗個幾鐘填詞，再喺專業錄音室錄製歌聲，笑稱估唔到連戴頂帽都咁難，全程拍咗10幾次，佢先至收貨。講多無謂，睇片最實際，可惜吖，梁美芬話要同成班同事開會，先至決定可唔可以公開喎（冇理由拍嚟自high咁嘥？唔通真係唔見得人而被「禁播」？）傳媒詫異佢都識rap？佢就話其實唔係第一次，4年前參選時都親自作過一首《快樂西九》。
想睇王晶「平衡吓《十年》」
除咗拍片，梁美芬亦話好鍾意睇戲，之前睇咗套《十年》，初二諗住去睇番場王晶新片「平衡吓」，點知因為買唔到飛，至今未睇到。至於新年計劃，佢話見到唔少對手喺街上張貼「滅鼠」標語，話對手如果真心想「滅鼠」，應該先同佢喺內地搵番嚟嗰位滅鼠師傅上吓堂，學吓滅鼠四十八式，「要同我合作，而唔係滅咗我」。
李八方
mailto:[email protected]