拜仁慕尼黑真係衰波，前晚喺德甲迎戰有五個主力停賽嘅達斯泰特，全場錄得36次攻門，但最終只係贏3:1而開唔到[-2]「主勝」，仲因為半場俾對方偷雞而落後0:1，爆咗個30倍嘅[客/主]出嚟。雖然佢哋贏波輸盤，但班粉絲都好開心，皆因養傷多時嘅列貝利同馬里奧葛斯都傷癒復出，其中前者仲後備落場踢咗37分鐘，令到教練哥迪奧拿喺周二訪祖雲達斯場歐聯16強首回合大戰，喺進攻方面多幾個選擇。另外，拜仁前鋒羅拔利雲度夫斯基雖然唔似巴塞前鋒蘇亞雷斯咁入成41球，但計埋上周六嗰一球，今季聯賽都入咗22球，連埋德盃同歐聯加埋都有32球；而佢嘅最佳拍檔湯馬士梅拿都好弗，入咗兩球，今季都入成24球咁多；睇嚟佢哋兩個周二喺都靈，可以畀到好多麻煩祖記門將保方。