M+視覺文化博物館有新搞作！聽日起至4月間，位於太古坊ArtisTree嘅「M+希克藏品：中國當代藝術四十年」藝術展，將會應用新科技iBeacon（低電量藍芽裝置）作電子互動展覽導賞（digital guide），打破咗本港歷來大型藝術展嘅導覽傳統，希望吸引到年輕人入場。
偵測位置 自動介紹
藝術展會展示逾80件展品，並按時序追溯40年中國當代藝術歷史，展覽一大突破在於其導賞形式，西九文化區管理局喺約2萬平方呎嘅展覽場地中設逾100個iBeacon作電子導賞，市民可以先喺智能電話下載定應用程式「M+希克藏品 M+ Sigg Collection」，然後安坐家中預覽15件精選嘅展品。
當你到咗藝術展現場後，以自己嘅智能電話或租借現場嘅iPad，開啟應用程式（App）中嘅定位服務同藍芽功能，iBeacon可以自動偵測參觀者位置，介紹身處位置嘅展品同藝術家資料，參觀者返屋企後仲可以重溫全部展品㖭呀！