一年一度嘅新春車牌拍賣聽日舉行，今年全場焦點肯定係「28」號車牌，無字頭雙位數車牌數目少，又諧音易發，係近年罕見靚冧把。另一個搶手貨就係同樣無字頭嘅「65」車牌。
睇番成交紀錄，去年無字頭「62」同「83」車牌分別以360萬同326萬成交。前年無字頭「87」車牌更以510萬成交。估計今年「28」同「65」車牌應該可以賣到300至500萬，不過優質幸運車牌中心董事顏文翰同八方講，今年經濟唔好，股市又跌，加上旺角騷亂等等政治因素，成個市道氣氛都好差，連帶市場上幸運車牌成交量亦大減，所以對聽日新春車牌拍賣成交價唔敢太樂觀。