話說民主黨主席劉慧卿等香港立法會議員，同成班外國議員去緬甸考察，噚日見到緬甸反對派領袖昂山素姬（圖），大家傾咗約半個鐘。
卿姐話，昂山同佢講，希望得到佢支持同鼓勵，而卿姐亦表明支持昂山同緬旬踏上民主之路，不過講到喺緬甸做議員，真係辛苦過香港好多。
昂山素姬話緬甸幾百位議員其實好窮，無法同其他國家議員相比，好多議員來自落後村落，其中一位嚟自山區嘅議員，要行成13日先可以到達佢個選區！
卿姐又讚昂山素姬係一位女強人，好清楚自己看法、好清晰、好果斷，對自己黨友、國家好了解。卿姐亦再次邀請佢來港，不過昂山要應付下月總統選舉，相信未必可以咁快有時間。