咩叫「醉翁之意不在酒」？上季巴甲亞軍明尼路周四搞嘅新波衫發佈會就係嘞，原本用嚟發佈今季新球衣，順便為前皇家馬德里、曼城同廣州恒大前鋒羅賓奴回流巴西做吓勢，點知球會安排咗兩個火辣辣模特兒出場；本來着波衫行吓貓步都叫正路，之後仲叫兩個淨係着黑色比堅尼，係咁意揸住球會旗幟行個圈（上圖），又叫做發佈會喎，擺明只係吸引另一班球迷啫。不過點都好，32歲嘅羅賓奴（左圖）淪為今次配角都冇影響決心，同明尼路簽約兩年嘅佢話首要目標係重返國家隊，仲希望幫明尼路贏得巴甲冠軍。
