仲有個多星期就係立會新東補選，補選氣氛隨年初一晚旺角騷亂而越炒越熾熱，噚日由港台主辦嘅論壇上，難得7位候選人都現身，但估唔到最爆seed嘅竟然係獨立方國珊（哪吒）嘅助選團，連環KO咗民建聯周浩鼎同埋新思維黃成智。
話說哪吒助選團問周浩鼎（圖），知唔知新東醫院聯網有邊幾區、邊幾間，周浩鼎氣定神閒，以為佢一定知答案，點知佢緩緩吐出一句：「我可以同大家一齊……去查問一吓呢個問題，大家一齊google一下都得！」八方聽到個答案幾乎跌係度。鼎！你真係好詼諧囉！
除KO周浩鼎，哪吒隊兵亦有質問黃成智，早前成智話唔支持佢就不如投方國珊，到底係咪想陷方國珊於不義呢？
黃成智即刻縮沙，反咬哪吒唔熟全民退保同北區水貨客問題，如果覺得佢叫人支持哪吒係害咗佢，佢話即刻呼籲︰「請你唔好支持方國珊，支持我。」哪吒聽到都不禁搖頭嘆息話「新思維反反覆覆好奇怪」。