真係戥800個作客丹麥去睇曼聯對米迪蘭特場歐霸嘅魔迷慘，畀錢買貴飛、睇波視線受阻，仲見證愛隊先勝後敗輸1:2，對住個厚顏領隊雲高爾又冇晒符，真係荷包傷之餘心仲傷。
負1:2魔迷鬧爆
曼聯周四踢歐霸盃32強首回合，作客丹麥嘅米迪蘭特。米迪蘭特坐地起價，大約800張作客門票開價71鎊（約800蚊港紙）一張；季初修咸頓作客踢歐霸都係開22鎊一張，𠵱家擺明搶魔迷錢啫！800勇士為咗支持愛隊，做水魚就做水魚，但入到場先發現好似動物園啲獅子、老虎咁，成個球迷區俾人用鐵欄圍住。你圍我後、左、右唔緊要，連看台前面都圍到咁，叫人點睇波呢！
睇完場波，相信800勇士會學識成語「黔驢技窮」點解。米迪蘭特初頭怯於曼聯聲名，踢得患得患失，紅魔仲靠迪比開紀錄；但米軍踢踢吓發現呢支曼聯得個名就放膽攻，完半場前先由施斯圖扳平，換邊後仲由安奴亞祖整多球反勝2:1。冇錯，曼聯就係嗰隻黔驢。睇到成肚氣嘅魔迷，完場嗰陣高呼F字頭粗口，但最谷氣係聽到雲高爾賽後講嘅嘢。可能佢老人家今季俾人鬧慣，不慍不火咁回應球迷怒火，「當你見到我哋下半場咁嘅表現，佢哋咁做都好合理；球迷鬧得啱，我哋要改善。」場場輸波都咁講，但改善永遠見唔到，咁同意見接受、態度照舊嘅高官有乜分別！
迪基亞膝傷「衰開有條路」
另外，曼聯最強之人、門將迪基亞賽前傷膝踢唔到；雲高爾話呢個係「梅菲定律」，成隊傷咗13個人後，第14個總會嚟。梅菲定律係西方諺語，意思係當一件衰嘢有可能發生，就一定會發生，但咁又唔見雲高爾被炒？可能炒雲高爾係好事啦。另有英國傳媒披露，如果曼聯下季冇得踢歐聯，球員會減25%人工。
