唔經唔覺，「財經界金句王」黎大鈞離開咗數碼通（315）半年，呢半年數碼通冇乜新消息，噚日忽然大鑼大鼓舉行猴年首個發佈會，由暫代黎大鈞嘅暫代總裁鄒金根主持。
鄒金根擔大旗推出嘅新服務，其實只係網上賣手機與配件，𠵱家好多電訊公司都有類似服務，實在冇乜新穎賣點，加上鄒金根係做技術出身，一向有嗰句講嗰句，花言巧語欠奉，唔似黎大鈞以前咁多金句彈出嚟，所以全程用咗廿分鐘左右就介紹完個服務。
大家好快就將焦點移咗去黎大鈞臨走時，高調留畀數碼通嘅最後禮物，即係營銷與支付平台「KISS」，當時大家仲講笑話黎大鈞想KISS大家Goodbye。不過，鄒金根噚日嘅講法，令人好有「人走茶涼」嘅感覺。
記得黎大鈞舊年8月31日last day，翌日業績會上鄒金根被問到「KISS」嘅進度時，佢就話每星期都有商戶加入平台，反應令人鼓舞，等到商戶達到一定數目就會推出。鄒金根噚日就改口風話，𠵱家重新審視緊「KISS」嘅業務模式。
唔通呢個「KISS」，好似前特首董建華嘅「八萬五」咁？