C朗醒神作客入波，佢宿敵美斯都唔執輸，喺周三到達另一個里程碑。巴塞隆拿喺周三西甲補賽作客希杭以3:1取勝，美斯喺上半場梅開二度，亦令佢喺西甲嘅累積入球突破300大關。
喺對希杭賽前已經累積入咗299個西甲入球，開賽只係25分鐘，就接應蘇亞雷斯傳波先開紀錄；雖然巴塞喺兩分鐘後被扳平，但到31分鐘阿蘇再次造就美斯入波。美斯梅開二度不但射入喺西甲第301球，亦係巴塞隆拿球會歷來各項正式比賽嘅第10,000球，由球王去入真係最適合不過。
巴塞上場大勝切爾達，美斯一球玩嘢12碼受到唔少批評，到今仗又有極刑，不過阿蘇正正經經去射又偏偏宴客，令到巴塞喺今季16次射12碼入得八球，成功率只得一半。好在阿蘇之後將功補過，喺67分鐘遠射破網，奠定3:1勝局，24戰得60分，榜首領先優勢增加到六分，進一步拋離第二位嘅馬德里體育會。