受「衰十一」官司困擾嘅阿當莊臣（AJ、圖）日前總算收到個好消息，舊老闆新特蘭大人有大量，唔會向佢追討賠償。阿當莊臣喺法庭認咗同未成年少女發生性行為後，新特蘭就同佢解約；據國際足協條例，新特蘭仲有權向阿當莊臣追討賠償。阿當莊臣原本同球會份約剩番半年，英國《太陽報》計過，加埋啲經理人費、簽字費同雜費，新特蘭可以向阿當莊臣追討約100萬鎊（約1,100萬港元），但「黑貓」算有人情味，放過阿當莊臣。