環球市況劇烈波動過後又平靜返啲，因為市場之前行早咗一步，未到爆炸嘅時間就以為危機已經發生咗，紛紛湧去避險。
話說花旗一直有個「投資時鐘」，呢個同「末日鐘」一樣嘅虛構鐘面，係用來參考唔同經濟情況下應該投資乜嘢資產。花旗話該行嘅「投資時鐘」顯示，股票泡沫要到9點鐘先爆破，但𠵱家其實只係到8點。
雖然根據花旗嘅講法，泡沫爆破時間距今仲有1個鐘，但市場就一度認為股票泡沫已經爆破咗，所以十分恐慌，觸發咗我哋之前見到嘅混亂市況。不過，唔少市場人士隨後都發覺其實仲未夠鐘爆炸，所以跟住就選擇入返貨，推動市場呢排由谷底反彈。
其實要預視危機發生唔難，最難嘅係準確預視危機真正到來嘅時間。如果世上有個真真正正實實在在嘅「投資時鐘」發售，等大家可以睇住時間嚟做部署，咁就人人都可以係投資贏家。好可惜現實並冇呢樣嘢，往往都要有某啲嘢發生咗，大家事後先知道原來時針已經行到去邊度，從而推敲返𠵱家到底幾點。花旗嘅「投資時鐘」亦不過係該行嘅推測，未必真正準確。
隨住泡沫爆破時間越來越近，筆者認為𠵱家入市博反彈同玩音樂椅一樣咁刺激，明知到咗9點音樂就會停低，但又冇任何「投資時鐘」提示你究竟𠵱家距離9點仲差幾遠，因此要喺夠鐘之前把握時間走人，並不容易。雖然未夠鐘爆炸，但環球市場其實已熊蹤處處，今趟反彈亦唔知可持續幾耐，所以老土都要講句，現階段博反彈應小心控制注碼，低吸者則應嚴守分注吸納原則。
El.
本欄逢周二、五刊出