業績一差，處處傳出凍薪風聲，真係心都寒埋，不過，原來，加人工實際有助一間公司的業績！而呢招「救市奇招」在零售業身上尤其應驗到，不少外國企業已經開始倣效。
外國傳媒報道，受環球經濟放緩，全球連鎖超市、百貨業「大阿哥」沃爾瑪（Wal-mart），計劃今年在美洲關閉270間分店，再在加拿大、中國開新舖，不過，沃爾瑪覺得重整分店數目未夠，仲諗到一招新招，就係加‧人‧工！
根據分析，超市、平價百貨公司等，如果在逆市中，幫基層員工加薪，基層市民即時多咗錢洗，最後，都係會落返面向基層的商家口袋入面，尤其定價低企嘅企業，包括平價超市沃爾瑪。
聽落好「奸商」，不過，你有人工加、有錢洗，我業績又有得升，完全係雙贏局面，何樂而不為呢？而且，仲可以宣傳埋良心企業形象，好過某獅子同可憐仔仔，頭家散晒咁。
加人工皆大歡喜，加一次都嫌唔夠，沃爾瑪基層員工去年已獲加薪，今個月又再加超過10%，最低時薪由9美元加至10美元。雖然話加人工，成本大咗，短期可能影響盈利，但長遠絕對有利，美國平價百貨公司T.J.Maxx、Target見到效果，今年都計劃跟隨加人工，咁香港零售業又會唔會諗諗佢呢？
759阿信屋老闆林偉駿被問到會否效法沃爾瑪「奇招」時，他認為加人工刺激香港內部消費行不通，因香港人喜歡出外旅遊消費。另外，他表示因員工表現不一，全面加人工有難度，反而會選擇透過獎金制度、以折扣價售賣優惠券予員工，鼓勵員工。
人力資源顧問Manpower Group大中華區高級副總裁徐玉珊認為，「加人工利好業績」在本港零售業同樣可行，但她提醒，外國企業多設有工會，為員工爭取福利及加薪，但香港少有，「唔可以用同一把呎度香港」。她估計，本港零售業今年加薪3-5%，與去年相若，但不會新增職位。