「你有冇女朋友？」「係咪唔講得？」一提到愛情，眼前的男生馬上變得忸怩萬分、支吾以對。睇怕觀眾們實在冇諗過，眼前呢位怕醜男仔，就係曾經問到律政司司長袁國強口啞啞嘅港台節目主持人——麥嘉緯。都係莎翁睇得通透︰“Words cannot express true love. ” 牙尖嘴利如麥嘉緯，喺愛情呢個題目面前都要口啞啞，應該嘅。
記者︰鄒倩婷、陳希雯、梁智威 攝影︰馮峰
80後，抱負理想，法律系畢業，這樣的背景並沒有培養出一位大律師，卻練就了一位小主持。「o依家荒謬嘅事係一星期幾單」，啱，港大、鉛水、簡體字、爛尾、魚蛋，隨意google一些生字，都可以變成香港一件荒謬事。唔想咁樣，麥嘉緯就找到另一種途徑去對抗荒謬︰「我覺得新聞或者傳媒係第4權，係應該監察社會，監察政府，我讀咗法律但唔做律師，做傳媒就係想做到呢樣嘢。」就係咁，放棄做或有機會大富大貴嘅律師工作，麥嘉緯卻選擇做一個普通主持人，純粹為咗發聲。
發聲，好容易引伸到示威抗命；示威抗命，就更容易引伸到黃絲藍絲的概括分類當中，麥嘉緯就好大膽咁表明立場︰「作為一個節目主持，我冇理由話自己係藍絲定黃絲，如果已經有個標籤喺我頭頂嘅話，好難令人覺得我做得合適。」小心啲，今時今日話自己中立，係難聽過粗口的。不過作為一個需要持平嘅節目主持人，呢個取態其實係咪更加合適？
做咗港台差唔多8年，單挑袁國強，試過，舌戰阿叻，試過，聲已經發過，但社會冇乜變過 (或者可以稱為worse than before)，咁麥嘉緯有冇灰心過？「有時做得耐會迷失，有時會有疑問，自己做唔做到呢？好似做咗啲嘢，又未必有人睇。但我會鞭策自己，莫以善小而不為，或者提返自己，團火唔好畀佢熄住！」啱，一個人一旦變得冇所謂，對社會環?生態政治點變都冇所謂嘅時候，一切就已經完結了。所以，小小火種，熄不得。
喺港台早前嘅《我係乜乜乜》男神選舉裡面，劉鳴煒憑住佢得天獨厚嘅package絕地反勝，但當中一位女孩Heather，事後卻表示唔揀游學修唔要劉鳴煒，偏愛麥嘉緯。當麥嘉緯聽到呢個消息時並冇靦腆，反而仲幽咗一默︰「都係一個小圈子選舉啫！」係囉，篩選好晒嘅，你叫人點揀！
訪問後記，反過來要讚讚當日嘅小妮子Heather，實在揀得唔錯。或者呢個唔單止係Heather's pick，我哋大家共同擁抱嘅，係一種香港仔向住目標進發嘅精神，同埋一團火。
好彩，麥嘉緯仲有團火；好彩，麥嘉緯做節目發聲嘅時候，並唔係只講情愛。所以我哋仍然可以喺港台節目度，見到能言善辯、並冇口啞啞嘅麥嘉緯。Thanks god！
1月12日即時新聞
【政見不同即飛】港女乜乜乜
唔buy劉鳴煒‧想揀麥嘉緯：陰濕得嚟有智慧
http://bit.ly/1l50PWv