今時今日做分析員，唔可以只坐喺寫字樓跟住數據模型寫報告，要出街行多啲先有米落鑊。
好似瑞信噚日出報告，講香港零售幾咁令人擔心。劈頭第一句就話，分析師喺農曆年間，逛過9個商場，籠統嚟講，放假比周末更靜焗，好少名店門口有人排隊，即使有，都係短龍；收銀處亦唔見好多人排隊畀錢，唔多人拎住大包細包購物袋。瑞信仲話，餐廳同中價貨店舖人流好過名店，化妝品店亦相對比較受歡迎。
瑞信呢四位分析師，形容得好有畫面，於是份報告就唔止一堆令人頭暈眼花嘅財務數據，生動好多。
早喺濠賭股當炒時，已有唔少分析員每隔一段時間就要過大海，巡賭場睇人流。𠵱家零售業分析員都要巡舖，實地考察多啲，唔知會唔會攞到靈感，提出有效救到零售業嘅方法呢？
未諗到好橋前，瑞信認為香港零售正失去競爭力，維持沽售評級。