講到政界嘅模範夫妻，民主黨立法會議員單仲偕同太太陳英儀肯定上榜，1986年結婚至今都鬼咁恩愛，兩個兒子仲越大越有型兼各有所成。可能情人節嘅溫馨纏綿餘溫仲未散，單雞噚日喺立法會晒戀愛史，霸氣話從未失戀過，皆因太太就係佢初戀情人，一直執子之手同偕白首，果真係one life one love。單雞講講吓仲騷埋當年sweet sweet拍拖照，繼而就話嘞，自己30年前好靚仔！點解要咁講呢？原來佢有啲「唔忿氣」，皆因有啲行家讚其他政界男士好靚仔，但佢就冇獲點名喎！查實單雞以前都有過「方中信」嘅稱號㗎，之不過近年呢個封號，已經去咗較佢年輕嘅自由黨主席鍾國斌身上咯！