【拆局】
現為新界東立會議員的自由黨榮譽主席田北俊，預測民建聯周浩鼎會勝出今次新東補選，相信不少支持民主派的網民會改投本土民主前線梁天琦，更直言「如果楊岳橋輸，就係輸咗畀呢位梁天琦。」有泛民中人指田分析與他們相同，「楊岳橋會高票過梁天琦，但兩個分開一定多唔過周浩鼎」。
有泛民中人指，本土近日全力為梁天琦谷票，除獨立議員黃毓民、熱血公民黃洋達全力為梁拉票，本土派更全力打網絡戰、動員年輕人全投梁天琦，「總之造到個勢，不問泛民輸贏個位，都要投梁天琦」。
該泛民指出，以他們估算，按目前形勢分析，楊可取得民主黨、公民黨及工黨等主流泛民在2012年立會選舉中最少一半選票，至於人力、社民連、新民主同盟的選票，在本土派力谷下，楊取得三成「已經好好彩」，其餘七成估計會全落入梁天琦手上，反而周浩鼎有望全取建制派絕大部份選票，「我哋估個票數一定唔準，但個趨勢應該正確：楊岳橋可以拎到10萬票以上，梁大約5萬以上，兩個夾埋會多過周浩鼎，但一分開就輸」，指梁天琦吸票越多，楊勝算越低。
■記者莫劍弦