中大校長沈祖堯以旺角騷亂令佢好痛心為由潛水，取消新春傳媒茶敍，科大校長陳繁昌（圖）對旺角事件都感到好傷心，但噚日按原定計劃偕管理層同記者拜年。記者當然有問陳校長點睇騷亂，佢話年初一、二仲喺美國開會，睇到發生流血衝突，好震驚同傷心。嚟緊大學職員同學生會陸續搞公投推動修改大學條例，陳校長話自己都可能投票表態，但只會視結果為參考。
科大今年25周年，有唔少大計，包括興建創新大樓，成立五個研究所，聘請至少25個教授，籌款係重要任務。不過，特首叫商界唔好捐錢喎，負責籌款嘅副校長翁以登笑笑口話冇聽過，暫時香港同內地都有商界、校友捐錢，堅稱全部冇附帶條件，但補充，最重要都係由政府帶頭，再啟動配對基金，先至最幫到院校籌款。