嚟緊周末戲碼最強嘅一場，肯定係車路士對曼城場英足盃。呢兩隊嚟緊夏天都會換領隊，車仔暫時由軒迪克頂住，而曼城就宣佈咗哥迪奧拿（左）做新主帥；小弟呢次就估吓佢點樣改造曼城做宇宙隊。
哥迪奧拿鍾意用聰明嘅球員，尤其係防中位，喺巴塞隆拿就重用布斯基斯做體系嘅中心；去到拜仁慕尼黑就搵拿姆踢防中，之後買咗沙比阿朗素嚟踢呢個位。曼城家陣有四位防中，真係唔覺邊個啱哥帥心水，戴爾夫、費蘭甸奴同費蘭度法蘭斯高都係工兵，至於耶耶托尼呢？如果耶耶踢得掂呢個位，就唔會俾人由巴塞賣嚟曼城啦。
撇除哥迪奧拿突然發掘到薩巴列達、沙格拿、高拉洛夫原來踢防中好勁，睇怕佢都要買人。呢類有腦防中係罕有動物，當打嘅都喺晒豪門度，易買啲應該係多蒙特嘅根度簡，級數低少少有慕遜加柏嘅格列沙加。打deep lying midfielder，其實經驗重要過體能，所以哥帥可以考慮吓老將，不妨留意吓巴黎聖日耳門嘅莫達吖，佢今年33歲，仲可以踢多一兩年。
曼城有好多衝鋒陷陣嘅人，就係冇一個總攬全局嘅「主帥」；耶耶似係，但實質都唔識控制節奏。如果哥迪奧拿搵到呢個人，曼城實力肯定升一個層次。
文：咖喱