頭場賽事五班1000米，由巫斯義策騎的鄭廐南非馬「你同我定」以10倍勝出。
「你同我定」這匹轉倉初出馬，過去在苗禮德馬房10戰，9次跑最後三名，但今場首次以鄭廐馬身份參戰，使用了居中戰略，即在直路上展示出強橫後勁，並越過一度出頭的亞軍馬「跑馬仔」贏馬，而練馬師Michael哥鄭俊偉，連贏三個本港賽日，若計埋「好好計」揚威杜拜新達加短途錦標，則鄭俊偉連勝四次賽事。
今場第三、四名，分別是「有料小子」及「回鄉更好」，四重彩31,794元。組合獨贏方面，則由A3其他冷門勝出，派23元。
鄭俊偉表示，「你同我定」轉入馬房時健康良好，馬身好靚，兩度試閘走勢都很好，由於牠曾內出血，谷草1000米有彎位可以有助回氣，比跑沙田一條直路冇咁辛苦。鄭俊偉又表示，由於看過「你同我定」以往常常有前冇後，因此向巫斯義提出可以留後少少，结果變招成功，順利贏馬。曾參加超級巨聲比賽的歌手劉威煌、廖仲謙，賽後有與馬主李文賢一起拉頭馬。
另外，近三戰鄭廐分別有「仁仁友福」、「皇仁大師」及今場「你同我定」用王牌報名贏馬，周日鄭廐兩匹王牌馬「贏盡」及「碧科」值得優先留意。