一講股市「燈神」，華華即刻想起沈振盈與孫柏文，佢哋當然唔會認喇，摩根士丹利有位美股策略師Adam Parker竟然就唔怕瘀，直接同客講，話自己係「燈」，跟佢嘅意見相反做就得。
Adam Parker近日發電郵向客戶認衰，指今年投資組合嘅表現衰到冇朋友，上月創出61個月以來最差表現，今個月未見好轉。鬼咩，佢哋目前最重倉係金融股，舊年4月建議增持金融股後，金融股就見頂回落。
佢認為，𠵱家環球市況極之奇怪，好多事情都唔合理，佢都唔識畀意見，照佢哋嘅意見，相反操作可能係最好。
不過，佢都為自己與分析團隊辯護兩句，指𠵱家有好多因素，包括能源價格大瀉、市場憂慮中國經濟進一步放緩、聯儲局政策可能有誤、投資者反應過份緊張、拋售潮勁過預期等等，都令分析師要經常調整預測。