猴年開市，港股紅盤變熊盤，連跌兩日後，本周好友反攻，本來連升兩日累升802點，相對之前兩日累跌968點，已幾乎收復晒失地，但昨日早段再升186點，累計升幅近千點後，旋即誘發獲利回吐，埋單倒跌197點，收報18924。大市料將先行整固，回補裂口後再衝。
下周一就係正月十五元宵節，即係中國情人節，後生仔女固然開心，細路仔仲興奮，可以拆利是。雖然我都唔細，但仍會收到長輩的利是，一年咁多節日，只得農曆新年可以收到不勞而獲的錢，老麥話齋，I'm lovin' it！
小朋友利是錢，有幾千元已經唔少，與其用來買玩具、買gadgets，不如用來投資。咁幾千元可以投資乜嘢？由於家長一般視之為教育基金一部份，投資年期隨時10年以上，所以可揀股價穩定的高息股或股息較低的增長股。藍籌股中，不乏選擇。以昨日收市價計，50隻藍籌股中，就有15隻，即係三成，入場費只需幾千元。當中包括新世界（017）、東亞（023）、旺旺（151）、利豐（494）、神華（1088）、友邦（1299）、百麗（1880）、中銀（2388）、四大內銀及三桶油。
近期環球股市跟油價走，既然係由資金推動的市況，唯有贒實油價走向。前日沙地、俄羅斯談判，同意將產量凍結，但減產憧憬落空，隔晚油價由升轉跌。就算大家肯減產，油價回升又會吸引頁岩氣進入市場，到時油價又跌過，買油股唔符合基本因素。
至於內銀股，雖然有消息指國務院考慮降低壞賬撥備覆蓋率，由150%降至120%，但事實上已有大型銀行用120%來做今年預算，所以即使成事，亦係心理刺激大於實際，對內銀盈利無乜幫助，頂多抵銷資產質素惡化。剛公佈業績的東亞，就因內地貸款減值倍增而少賺17%。
友邦下周四放榜
剔除受油價和中國風險影響的股份，仲有幾隻可揀，我的心水係友邦。雖然銀聯月初開始嚴格執行內地人以銀聯卡在境外投保，每宗交易唔可以超過5,000美元，但花旗、德銀、美銀美林等大行認為，有關措施對友邦業務前景影響有限，而且銀聯並無限制每日簽賬次數。友邦下周四公佈截至去年11月底止全年業績，預期新業務價值可維持20%以上增長，上述大行均維持買入評級，目標價介乎56.5至60元。友邦昨收報38.25元，不妨等放榜，睇下係龍係鳳再定奪。
割柑人
本欄逢周四刊出